《布萊希特‧周恩來‧二三事》第一部序場詩

《布萊希特‧周恩來‧二三事》第一部

(2008.8.14一稿) (2017.11.16二稿)

盧偉力

序場

朗誦隊：我地即將向各位敘述

一個戲劇家

同一個政治家嘅幾件事

將佢地放埋一齊

相提並論

固然係借題發揮

亦都係有根有據

戲劇家同政治家

佢地都係時代靑年

時代風起雲湧

佢地踏步向前

戲劇家熱衷政治

佢生長喺大戶人家

從小嬌生慣養

任性係佢嘅姿態

率性係佢嘅行為

(聽講佢好細個就做咗爸爸)

但係長大之後佢厭惡俾人服待

於是佢離開佢漂亮嘅女僕人

(佢嘅女人)

脫離原來嘅階級

投身於普羅大眾

佢搵到出路

佢參加政治劇場

用戲劇改變世界

世界冇因佢改變

佢嘅祖國仲發動世界大戰

佢要離開祖國流亡，不過

佢真係改變咗戲劇

政治家好鍾意戲劇

佢經常踏台板

中學，佢反串女角演文明戲

全校讚賞，往後幾十年

喺政治舞台上

佢繼續扮演好多角色

佢投身革命

為咗建立一個理想嘅世界

世界有冇變得理想咗

未有定論 (或者永遠都唔會有)

但係，佢改變咗祖國

因為，佢令祖國嘅歷史

變得更精彩，因為

佢令祖國嘅歷史

充滿戲劇性

戲劇家同政治家

佢地都係革命者

時代風起雲湧

佢地迎上前去

佢地信仰馬克思主義

用唔同嘅方式效忠

戲劇家從來冇加入共產黨

但好多人叫佢共產黨人

政治家好早就加入共產黨

喺必要時刻，甚至揸槍打仗上戰場

戲劇家同政治家

生於不同國家，但係

佢地活喺同一時代

1898

請記住呢一年

呢年係轉折

世界有好大變化

喺西方

一個幾百年殖民强國

被一個新近冒起嘅國家打敗

「美西戰爭」，美國勝，西班牙敗

佢地話「帝國主義」時代已經到來

喺東方

幾年前，一個幾千年古老大國

被一個近鄰小國打敗

「甲午戰爭」，日本勝，中國敗

但係喺1898

腐敗嘅皇朝亦有維新嘅聲音

「戊戌維新」！好似塊大石掉落個古井

聲音好響，濺起過水花

水花消失之後

歷史唔再一樣

因為水位高咗

1898

請記住呢一年

呢年係轉折嘅一年

呢年

戲劇家與政治家

出—生